బాలకృష్ణ, నరేష్ సేవలు స్పూర్తిదాయకం..!

దుర్గి మండలం, అడిగొప్పల గ్రామానికి చెందిన ఎన్ఆర్ఐ యాగంటి బాలకృష్ణ, మండల టీడీపీ యువ నాయకులు యాగంటి నరేష్ ల సేవలు స్పూర్తిదాయకమని శాసన సభ్యులు జూలకంటి బ్రహ్మానందరెడ్డి కొనియాడారు. అడిగొప్పల గ్రామానికి చెందిన మాశెట్టి భాస్కరరావు అనే విద్యార్థికి ఉన్నత చదువులు ఆర్థిక భారం కావడంతో విషయం తెలుసుకున్న బాలకృష్ణ, నరేష్ లు పీ-4 కుటుంబం ద్వారా విద్యార్ధి చదివించేందుకు ముందుకు వచ్చారు. బుధవారం వెల్దుర్తి ఎమ్మెల్యే క్యాంపు కార్యాలయంలో శాసన సభ్యులు జూలకంటి సమక్షంలో పీ – 4 బంగారు కుటుంబం ద్వారా విద్యార్ధిని దత్తకు తీసుకున్నట్లు ప్రకటించారు. అలానే బాలకృష్ణ, నరేష్ లు చెరో రూ. 50 వేల చొప్పున మొత్తం రూ. లక్ష నగదును ఎమ్మెల్యే జూలకంటి చేతుల మీదుగా అందించారు. ఈ సందర్భంగా ఎమ్మెల్యే మాట్లాడుతూ.. పీ – 4 విధానంలో దాతలు ముందుకు వస్తే.., పేదరికం దరిచేరదన్నారు. ముఖ్యమంత్రి చంద్రబాబు నాయుడు దార్శనిక ఆలోచన పీ-4 బంగారు కుటుంబాలని.., ఆ ఆలోచనలకు తగ్గట్లు మార్గదర్శులుగా నిలుస్తున్న దాతలకు ఆయన కృతజ్ఞతలు తెలిపారు. ఈ సందర్భంగా యాగంటి బాలకృష్ణ, నరేష్ లను ఆయన అభినందించారు.

నియోజకవర్గ పరిధిలో దాతలు ముందుకు వచ్చి .., పేదరికాన్ని పారదోలడంలో భాగస్వామ్యం వహించాలని కోరారు.