మాచర్ల నియోజకవర్గం, వెల్దుర్తి మండలం, పట్లవీడు గ్రామంలో తెలుగుదేశం పార్టీ సీనియర్ నాయకులు బత్తుల అంకమరావు ఆధ్వర్యంలో శ్రీ శబరిమల అయ్యప్ప స్వామి వారి పడిపూజ మహోత్సవం అంగరంగ వైభవంగా జరిగింది. ఈ పూజా మహోత్సవంలో మాచర్ల ఎమ్మెల్యే జూలకంటి బ్రహ్మానందరెడ్డి పాల్గొని, పంచామృతాలు, వివిధ రకాల ద్రవ్యాలతో విశేష పూజలు నిర్వహించారు. అనంతరం ఆయన మాట్లాడుతూ.. పవిత్ర కార్తీక మాసంలోని చివరి సోమవారం నాడు మాల ధరించిన స్వాములు కోసం, భక్తుల కోసం ఇటువంటి పడిపూజ మహోత్సవ నిర్వహించడం ఆధ్యాత్మిక ఆనందాన్ని కలిగిస్తుందని చెప్పారు.
వైవిధ్యభరితమైన శోభాయమానమైన విద్యుత్ దీపాల అలంకరణలు, భక్తి గీతాల ఆలాపన, వేద పండితుల వేదమంత్రోచ్ఛారణల నడుమ పట్లవీడు గ్రామం ఆధ్యాత్మిక శోభను సంతరించుకుంది. ఈ కార్యక్రమంలో వెల్దుర్తి మండల టిడిపి నాయకులు,కార్యకర్తలు పాల్గొన్నారు.